Кожны дзень багаты на падзеі

Будучыня нашай арміі — падрастаючае пакаленне. Учарашнія падлеткі ўжо сёння стаяць у шэрагах нашай арміі, а змена ім навучаецца ва ўстановах адукацыі нашай краіны, на чале якіх стаяць кадэцкія вучылішчы і Мінскае сувораўскае ваеннае вучылішча.

капустин н.jpg

Сярод будучых абаронцаў Айчыны ў сувораўскіх пагонах — ураджэнец горада Бабруйска Данііл Капусцін. Хлопец вучыцца на другім курсе ў Мінскім сувораўскім ваенным вучылішчы.

— Мой прадзед — удзельнік Вялікай Айчыннай вайны, камандаваў вялікім атрадам партызан, — падзяліўся Данііл. — Раўняючыся на яго, я вырашыў працягнуць ваенную дынастыю ў нашай сям'і. Неяк ў дзяцінстве бачыў па тэлевізары, як маршыруюць сувораўцы. І вырашыў, што хачу стаць адным з іх.

Не сакрэт, што паступіць у МСВВ — задача не з простых. Трэба прадэманстраваць высокі ўзровень ведаў і абыйсці ў інтэлектуальнай гонцы іншых абітурыентаў. А іх традыцыйна нямала.

— У Бабруйску навучаўся ў сярэдніх школах № 27 і 30, — расказаў хлопец. — Там даюць вельмі добрую прадметную пад­рыхтоўку. Атрыманых ведаў мне хапіла, каб апынуцца ў ліку лепшых абітурыентаў і без праблем паступіць у вучылішча.

Абітурыенты здаюць экзамены па матэматыцы, рускай ці беларускай мове, фізічнай падрыхтоўцы, а таксама праходзяць псіхалагічнае тэсціраванне. І толькі лепшыя атрымліваюць права насіць ганаровае званне — суворавец.

— Дзякуючы афіцэрам і выкладчыкам я хутка адаптаваўся да новага ўкладу жыцця, — распавёў Данііл. — Да строгага распарадку дня з цягам часу прывыкаеш. Цяпер для мяне адзін з самых складаных, але ў той жа час цікавых элементаў навучання ў вучылішчы — вывучэнне замежнай мовы. Гэтым мы займаемся паглыблена — пяць дзён на тыдзень.

Кожны дзень сувораўцаў багаты на падзеі: яны вучацца, удзельнічаюць у розных канферэнцыях, інтэлектуальных шоу, паэтычных вечарынах, наведваюць тэатры, кіно…

— Больш за ўсё я люблю экскурсіі ў музеі, — адзначыў Данііл. — У іх — гісторыя многіх пакаленняў. Асабліва мне падабаецца Беларускі дзяржаўны музей гісторыі Вялікай Айчыннай вайны. Гэта галоўнае сховішча рэліквій ваеннага перыяду ў Беларусі. Захоплівае дух, калі ўяўляеш, праз якія жахі прайшлі нашы продкі, здабываючы перамогу. І ў той жа час захапляешся іх мужнасцю і гераізмам.

У школе Данііл палюбіў спорт. На працягу васьмі гадоў займаўся таэквандо. Выступаў на розных спаборніцтвах як унутры краіны, так і за яе межамі. Мае ў сваёй скарбонцы каля 30 медалёў, з якіх 16 — вышэйшага гатунку. За свае спартыўныя заслугі хлопец атрымаў 1‑ы дан па таэквандо і званне кандыдата ў майстры спорту.

— У сувораўскім створаны ўсе ўмовы для росту ў спартыўнай кар'еры, — падзяліўся Данііл. — У нас шмат трэнажораў і пляцовак, дзе можна праводзіць трэніроўкі любой складанасці. А вопытныя выкладчыкі заўсёды дапамогуць зрабіць падрыхтоўку больш якаснай і эфектыўнай. Таму у планах — палепшыць узровень фізічнай падрыхтоўкі і атрымаць на спаборніцтвах чарговы тытул.

У працэсе навучання ў МСВВ сувораўцы рэгулярна наведваюць

розныя ваенныя факультэты ў грамадзянскіх вну і Ваенную акадэмію Рэспублікі Беларусь. Знаёмяцца з побытам курсантаў і спецыфікай падрыхтоўкі будучых афіцэраў. У ходзе такіх экскурсій многія і вырашаюць, якім будзе іх далейшы жыццёвы шлях.

— Планую паступаць у Ваенную акадэмію на факультэт сувязі і аўтаматызаваных сіс­тэм кіравання, — падзяліўся суворавец. — І ажыццявіць мару — аднойчы надзець афіцэрскія пагоны.

У многіх сувораўцаў ёсць узор для пераймання. Для кагосьці гэта сваякі ў пагонах, некаторыя натхняюцца героямі перыяду Вялікай Айчыннай вайны. А Данііл знайшоў свайго куміра ў сценах МСВВ.

— Мой камандзір — мой кумір, — расказаў суворавец. — Капітан Аляксандр Салагуб вельмі дысцыплінаваны, адказны, але ў той жа час добры і клапатлівы. Ён заўжды побач і дапамагае нам спраўляцца з усімі складанасцямі. Гляджу на яго і разумею, што хачу быць такім жа — сапраўдным афіцэрам.

Аляксандр Валянцінавіч задаволены настроем свайго выхаванца. Афіцэр упэўнены, што Данііла чакае вялікая будучыня, бо ўжо зараз ён вылучаецца сваёй працавітасцю, дысцыплінаванасцю і жаданнем авало­даць ваеннай прафесіяй. З такім настроем і жаданнем вучыцца ён абавязкова стане сапраўдным прафесіяналам.

…Прыязджаючы дадому, у Бабруйск, Данііл сустракаецца з сябрамі. Распавядае пра свае сувораўскія будні, планы на будучыню. І асабістым прыкладам агітуе аднагодкаў і малодшых таварышаў звязаць сваё жыццё з арміяй. Таму што гэта ганарова, прэстыжна і неабходна.

Таццяна Грыгаран, фота аўтара

К 9 мая 2020 года под российским Ржевом появится ...
Праздник в Гродно — всенародное торжество
Архив выпусков