Дата ў календары У пошуках даўніны

15 жніўня традыцыйна ў Беларусі адзначаецца Дзень археолага. Прафесійнае свята тых, хто сваё жыццё звязаў з вывучэннем гісторыі чалавецтва. Трэба адзначыць, што наша зямля хавае шмат таямніц. І каб іх разгадаць, трэба прыкласці шмат намаганняў. У адзіночку вучоным не справіцца з гэтай задачай, і таму для археалагічных раскопак заўсёды запрашаюць валанцёраў. Найбольш прыдатны час для такіх прац — лета.

Археалагічныя даследаванні праводзяцца з дазволу Нацыянальнай акадэміі навук Беларусі. У гэтым годзе такіх дазволаў было выдадзена, напрыклад, больш за 150. Археалагічны нагляд абавязковы і пры правядзенні будаўнічых і рамонтных прац на тэрыторыях архітэктурных помнікаў, у гістарычных месцах.

Сёлета валанцёры шчыравалі на Вушаччыне, дзе даследавалі шляхі полацкіх князёў; на мяжы Сенненскага і Бешанковіцкага раёнаў, дзе было выяўлена паселішча першабытных людзей першай паловы ІІ тысячагоддзя да нашай эры; на Мядзельшчыне, дзе вяліся даследаванні пахаванняў крывічоў; на Смаргоншчыне, дзе працягваліся працы на Крэўскім замчышчы; у вёсцы Гарадзішча пад Мінскам, дзе калісьці была княжацкая рэзідэнцыя, і не толькі.

Было знойдзена шмат цікавых артэфактаў, якія стануць прадметам даследавання спецыялістаў. І магчыма, з цягам часу ў падручніках гісторыі тое-сёе давядзецца перапісаць. Калі ў вас узнікла жаданне паспрабаваць сябе ў якасці археолага, сачыце за абвесткамі, і магчыма, менавіта вам пашчасціць адкапаць клад залатых манет або княжацкую пячатку.

Галіна Баравіцкая, фота аўтара

Защита информации как профилактика кибертерроризма
Особенный день
Архив выпусков