Зямля пад белымі крыламі

Калісьці такое азначэнне Беларусі даў слынны пісьменнік Уладзімір Караткевіч. Менавіта яно ўсплыло ў памяці, калі я ўбачыла на фотавыставе «Беларусь: прыгожыя імгненні», што дзейнічае зараз у Нацыянальнай бібліятэцы Беларусі, здымак «Бусел», зроблены Ігарам Бышнёвым. Фотамастаку ўдалося падлавіць момант, калі гэта велічная птушка падымалася ўвысь на фоне вечаровага сонца. Барвы адлюстроўваліся ў аблоках, а птушка плаўна лунала ў паветры.

І такіх чароўных і характэрных імгненняў на выставе прадстаўлена 20. Сярод іх — зубрыная сям’я, фантастычныя абрысы населеных пунктаў з вышыні птушынага палёту, непаўторныя краявіды, перліны архітэктуры, дзеці.

Аўтары фотаработ — вядомыя майстры не толькі ў нашай краіне, але і за яе межамі, лаўрэаты шматлікіх прафесійных конкурсаў Ігар Бышнёў, Максім Вейзе, Юлія Войніч, Кацярына Міціна, Сяргей Плыткевіч, Улад Сакалоўскі, Сяргей Тарасаў.

Дзякуючы Сяргею Плыткевічу мы можам паглядзець на нашу краіну з іншага ракурсу, з вышыні, адкуль знаёмыя воку краявіды выглядаюць зусім па-іншаму, нечакана.

Вельмі пазітыўнае ўражанне стварае праца Кацярыны Міцінай «Маленькая радасць». Вясковая вуліца, плецены кошык з крамянымі яблыкамі, басаногая дзяўчынка ў яркай сукенцы… Без замілавання нельга глядзець на непасрэднасць дзяўчаняці, з якой гэты маленькі чалавечак радуецца жыццю.

IMG_20200315_171855.jpg

На мяжы з жывапісным палатном, напісаным вопытным пэндзлем, успрымаецца праца Максіма Вейзе «Красавіцкая раніца на рацэ Пціч».

Па-мастацку, глыбока бачыць свет і Улад Сакалоўскі. Яго праца «Пейзаж — гэта стан душы» настройвае на філасофскі лад.

Плануецца, што на працягу 2020 года выстава пабывае і ў краінах Еўропы. Абавязкова завітайце на вернісаж, пазнаёмцеся нанова з нашай краінай, ацаніце яе прыгажосць і непаўторнасць.

Святлана Пятрова, фота аўтара

В этой бригаде служить престижно
Город мира и добра
Архив выпусков