Існае ў колеры

Імя мастака Міколы Бушчыка добра вядома ў нашай краіне і за мяжой. Яго талент быў заўважаны адразу і ацэнены сучаснікамі. Працуе пераважна з алеем, але таксама звяртаецца і да акварэлі.

Па прызнанні самога майстра, ён у сваіх творах імкнецца адлюстра­ваць прыгажосць навакольнага свету. Але тут трэба адзначыць, што вялікую ролю адыгрывае і прызма асабістага пазітыўнага ўспрымання свету мастаком. Відавочна, гледзячы ў адно і тое ж вакно, розныя людзі засяродзяць сваю ўвагу на розных рэчах. Памятаеце, у Расула Гамзатава: «В окно смотрели двое: Один увидел дождь и грязь,/Другой — листвы зеленой вязь,/Весну и небо голубое./В окно смотрели двое…».

Гэтыя радкі дакладна тлумачаць, чаму з‑пад пэндзля мастака выходзяць такія неверагодна прыгожыя, маляўнічыя пейзажы. Творы атмасферныя, пазітыўныя. А самае галоўнае — упэўніваешся, што гэта на самой справе так — наша краіна вельмі прыгожая. Ля прац хочацца затрымацца, насыціцца тым светам, што зыходзіць ад іх. Ад карцін вее дабрынёй, яны заварожваюць, запрашаюць у чароўны свет прыгожага, запрашаюць адарвацца ад мітусні штодзённасці, запрашаюць зазірнуць у вечнасць…

Творчасць мастака можна характарызаваць такімі паняццямі, як шчырасць, адкрытасць, цеплыня, жыццялюбства. Мова твораў — метафарычная, падобная на музыку… Аўтар смела эксперыментуе з колерам. Бадай, менавіта колер з’яўляецца пераважным сродкам выражэння мастака.

IMG_20191023_195644_HDR.jpg

IMG_20191023_200830_HDR.jpg

Відавочна, што аўтар — чалавек філасофскага складу, удумлівы, непавярхоўны. Магчыма, такім ён стаў дзякуючы жыццёвым катаклізмам, што выпалі на яго долю… Калі Міколу споўніўся год, сям’я пераехала ў Краснадар, бо сур’ёзна захварэла маці. Ён быў малодшым школьнікам, калі маці пайшла з жыцця. Бацька будучага мастака стварыў новую сям’ю, і некаторы час яны жылі ў Расіі, потым у Беларусі, зноў вярнуліся ў Расію… Скончыўшы восем класаў, Мікола Бушчык паступіў у Краснадарскае мастацкае вучылішча, якое скончыў з адзнакай. Працягнуць вучобу вырашыў у БДТМІ на аддзяленні жывапісу. Працы маладога мастака адразу звярнулі на сябе ўвагу, было зразумела, што гэта самабытны арыгінальны творца. І творы пачаткоўца сталі карыстацца попытам, што дазволіла праз шэсць год звольніцца з дзяржаўнай працы і пайсці на вольны хлеб. І так атрымалася, што Мікола Бушчык не трапіў ні пад які ўплыў, застаўся самабытным творцам. Яго творы ўспрымаліся як наватарскія, неаднаразова яму прапаноўвалі пераехаць за мяжу, але Мікола Бушчык верны той зямлі, якая ўскарміла яго, дала пуцёўку ў жыццё, натхняе на творчасць.Ён з задавальненнем падарожнічае, удзельнічае ў розных пленэрах, але заўсёды з радасцю вяртаецца дамоў. Месцам сілы для мастака з’яўляецца родная Слонімшчына. Рэгулярна там ладзяцца выставы твораў. Адзін з сыноў мастака пайшоў па бацькавай дарозе. Мікола Бушчык лічыць, што кожны чалавек прыходзіць на зямлю з пэўнай місіяй. Што ў кожнага свая дарога, і самае галоўнае — адшукаць яе і смела крочыць наперад. Што павінна быць асэнсаванне, для чаго чалавек робіць гэта ці тое.

IMG_20191023_201011_HDR.jpg

Мікола Бушчык перакананы яшчэ і ў тым, што сучаснаму чалавеку як ніколі патрэбны пазітыўныя эмоцыі: ад сузірання прыгажосці, ад праслухоўвання прыгожай музыкі, ад прачытання якаснага мастацкага тэксту. Яго ўласнае адкрыццё апошняга часу — творчасць пісьменніка Іосіфа Крашэўскага. Гэта дазваляе крыху прыпадняцца над штодзённасцю, глядзець не толькі сабе пад ногі, але і за лінію гарызонту.

Упэўнена, аднойчы пазнаёміўшыся з працамі мастака, вы ніколі яго ні з кім не зблы­таеце. І што цікава: яго акварэлі такія ж паўнаколерныя, як і працы, выкананыя алеем. Адкрыйце для сябе творчасць Міколы Бушчыка, наталіце прагу душы па прыгожаму.

Галіна Баравіцкая, фота аўтара

***

 Дасье

Нарадзіўся ў 1948 годзе на Слонімшчыне. Скончыў Краснадарскае мастацкае вучылішча, Беларускі дзяржаўны тэатральна-мастацкі інстытут. Член Беларускага саюза мастакоў. Працы мастака знаходзяцца ў шмат якіх галерэях і музеях нашай краіны і замежжа, а таксама ў прыватных калекцыях.

Армия — труженикам сельского хозяйства
«Опыт — лучший учитель»
Архив выпусков