«Настальгія па сапраўднаму»

Назвай для выставы твораў Ларысы Журавовіч, якая экспануецца ў сталічнай мастацкай галерэі «АртХаос», паслужылі радкі паэта Андрэя Вазнясенскага, напісаныя ў далёкім 1976 годзе. Але нездарма паэтаў клічуць правідцамі. Цяжка паверыць, што больш за сорак гадоў назад былі напісаныя радкі: «Все из пластика, даже рубища. Надое­ло жить очерково.» Дастаткова азірнуцца вакол, каб упэўніцца ў справядлівасці яго слоў… Пластык, ГМА, 3D, 4D, кліпавае мысленне… Робаты, штампы, клішэ. Сучасныя тэхналогіі дазваляюць змадуляваць практычна ўсё. І ўсё цяжэй адрозніць новаробы ад сапраўднага.

IMG_20190909_201748_HDR-watermarked.jpg

На вернісажы Ларысы Журавовіч час як бы запавольваецца. Вось вы яшчэ некалькі хвілін назад былі на тлумным праспекце, а перасекшы мяжу галерэі, апынуліся ў атмасферы цішыні, супакоенасці. Вока радуецца пастаральным сюжэтам. Сонечныя сланечнікі, вяргіні, паспелая садавіна, няхітры нацюрморт з боханам хлеба, саганком бульбы, гладышом малака, плецены кошык, поўны грыбоў… У такім атачэнні чалавек адчуваў сябе арганічна, ён не губляўся, жыў у гармоніі з сабой і светам. Яго жыццё было падпарадкавана земляробчаму календару. Некалькі дзясяткаў прац, прадстаўленых на вернісажы, ілюструюць у асноўным жнівеньска-вераснёўскую пару, калі падыходзіць пара збіраць ураджай, калі зеляніна лістоты змяняецца золатам…

Але некаторыя дэталі на палотнах падказваюць, што свет, адлюстраваны мастачкай у творах, знікае… Замест статку гавяды на поплаве пасвіцца адзінокая пярэстая, студня — нахіленая, да вясковых хат вядзе вузенькая сцежка…

IMG_20190909_202736_HDR-watermarked.jpg

Настальгія па сапраўднаму… Відавочна, для мастачкі сапраўднае — блізкае да вытокаў, да каранёў, да роднай зямлі. І яна запрашае нас, жыхароў каменных джунгляў, да суперажывання. Зноў узгадваюцца радкі паэта: «Упаду на поляну — чувствую по живой земле ностальгию».

Мастачка вельмі дакладна, нават фатаграфічна, вымалёўвае дэталі. Тым самым Ларыса Журавовіч як бы імкнецца засяродзіць нашу ўвагу на простых рэчах, каб мы прыпыніліся і… убачылі прыгожае ў простым.

Кацярына Іванова, фота аўтара

Прямая телефонная линия
С чувством гордости и благодарности
Архив выпусков