Сам сабе лекар

Жыццё час ад часу падкідвае нам «сюрпрызы», як бы правяраючы нас на трываласць, маўляў, а ці справіцеся вы?

І сапраўды, каб справіцца, трэба мець пэўны арсенал сродкаў. Гэта актуальна асабліва зараз, калі наша жыццё бывае проста перанасычана стрэсавымі сітуацыямі.

Перш-наперш трэба спыніцца і «прадыхаць» сітуацыю. Засяродзіцца на гэтым працэсе, зрабіць глыбокі павольны ўдых праз нос і такі ж павольны выдах. Паўтарыць некалькі разоў. У галаве праясніцца, і вы зможаце сабрацца з думкамі. І акажацца, што не так ужо ўсё і дрэнна.

Абавязкова паклапаціцеся пра сябе: для аднаўлення сіл жыццёва неабходны сон. Адсутнасць дастатковай колькасці сну ўжо сама па сабе з’яўляецца стрэсам. Аптымальная колькасць — 8–9 гадзін.

Харчаванне павінна быць разнастайным і карысным. Кантралюйце гэты працэс, бо ў стрэсавым стане чалавек або наогул адмаўляецца ад ежы, або «заядае» стрэс. Гэта аднолькава шкодна для арганізма. Пра­аналізуйце, ці дастаткова ў рацыёне важных мікраэлементаў і вітамінаў. Справіцца са стрэсам дапамагаюць вітаміны групы В, магній, кальцый, лецыцін, амега‑3. Зазірніце ў аптэку. А яшчэ важна есці не механічна, а асэнсавана, павольна, адчуваючы смак ежы, ацэньваючы від стравы. Парадуйце сябе тым, што вам падабаецца.

Дайце арганізму фізічную нагрузку. Выберыце тое, ад чаго вы атрымліваеце найбольшую асалоду. Пачніце з малога і зрабіце гэта штодзённай звычкай. Можаце проста патанцаваць пад любімую музыку.

Размаўляйце пра тое, што вас турбуе, не трымайце ў сабе. Спрабуйце гаварыць са сваякамі, сябрамі, знаёмымі, спецыялістамі. Калі не атрымоўваецца, давярайце набалелае паперы. Тут важна скінуць з душы цяжар. Дазвольце сабе паплакаць. Стаўшы дарослымі, мы забываем пра гэты вельмі дзейсны сродак ачышчэння ад негатыву. Не менш эфектыўны спосаб — «пракрычацца». Толькі выберыце для гэтага падыходзячае месца: бязлюдны парк, лес, поле. Дайце волю голасу.

Часцей займайцеся тым, што вам падабаецца. Знаходзьце для гэтага час, вы адчуеце, як напаўняецеся энергіяй, у вас з’яўляюцца сілы.

Прааналізуйце, што адбываецца вакол вас. Дзе вы найбольш траціце душэўных і фізічных рэсурсаў? Адмоўцеся ад стасункаў, людзей, кантэнту, размоў, якія нічога добрага вам не даюць. Памятайце, што жыццё ў кожнага з нас адно, і важна навесці ў ім парадак, а найперш — у галаве. Якія думкі круцяцца там штодзённа? Правядзіце рэвізію. Упэўнена, вы будзеце

здзіўлены. Вучыцеся жыць цяпер і зараз, а не там, у міфічнай будучыні.

Вельмі эфектыўна дапамагае справіцца са стрэсам арт-тэрапія. Выберыце тое, што вам бліжэй: маляванне, расфарбоўка, аплікацыя, лепка, роспіс, арыгамі. Тут важны не сюжэт, прапорцыі, падабенства, а сам працэс узаемадзеяння з рэчамі.

А самае галоўнае — памятайце мудрае выказванне з пярсцёнка цара Саламона: «І гэта пройдзе».

Будзьце здаровыя і шчаслівыя!

Святлана Пятрова

«Безопасность. Бережливость. Качество»
«Самая большая радость — видеть результат своего...
Архив выпусков